Góðan daginn Grindvíkingur

Í þessum þætti af Góðan daginn Grindvíkingur ræðum við við Guðrúnu Pétursdóttur og Ingibjörgu Lilju Ómarsdóttur, sérfræðinga í endurreisn samfélaga í kjölfar náttúruhamfara.  Í viðtalinu ræða þær m.a. hvernig hamfarir hafa áhrif á fólk og samfélög til lengri tíma og hvers vegna hver rödd allra Grindvíkinga skiptir máli þegar kemur að bataferlinu, uppbyggingu og framtíðarsýn Grindavíkur.

Í þessum þætti af Góðan daginn Grindvíkingur ræðum við við Guðfinnu Magnúsdóttur, ljósmyndara og einn af stofnandum hönnunarhússins VIGT. Þá á Guðfinna sæti í stjórn Járngerðar. Í viðtalinu ræðir hún m.a. um æskuárin í Grindavík, áhrif samfélagsins á sköpunargleðina og það hvernig fjölskyldurekstur hefur orðið að lifandi hluta af bæjarmenningunni.

Í þessum þætti af Góðan daginn Grindvíkingar ræðum við við Otta Rafn Sigmarsson, framkvæmdastjóra HP flutninga og einn af burðarásunum í starfi Björgunarsveitarinnar Þorbjarnar. Otti hefur verið í framlínu björgunarstarfa í Grindavík í áratugi og stóð vaktina þegar allt breyttist þann 10. nóvember 2023. Í viðtalinu rifjar hann upp æskuárin í Grindavík, fyrsta útkallið, áskoranirnar sem fylgdu rýmingunni og hvernig hann leiddi skipulagningu aðgerðanna með reynslu og yfirvegun að vopni. Hann talar einnig um vináttuna, félagsskapinn og trúna á að Grindavík rísi aftur.

„Ég held að framtíð Grindavíkur sé björt – jafnvel bjartari en áður.“ Í þessum þætti af Góðan daginn, Grindvíkingar ræðum við við Sigurð Rúnar Karlsson, forstöðumann þjónustumiðstöðvar Grindavíkurbæjar – oft kallaðan Sigga Garðhúsum. Sigurður var fyrsti maðurinn sem snéri aftur í bæinn eftir rýmingu þann 11. nóvember 2023. Þar tók hann fyrstu skrefin í viðgerðum og uppbyggingu sem hann hefur stýrt af festu og jákvæðni síðan. Hann segir frá æskuárunum í Garðhúsum, áhrifum hamfaranna á sitt eigið heimili og þeirri von sem hann ber í brjósti fyrir framtíð bæjarins. Þátturinn fjallar um bjartsýni, þrautsegju og trú á samfélagið – og sýnir okkur hvernig verkvit og vilji geta orðið burðarás í endurreisn.

Jóhanna Lilja Birgisdóttir, sálfræðingur og framkvæmdastýra þjónustuteymis Grindvíkinga, ólst upp í Grindavík og býr yfir sterkum tilfinningalegum tengslum við heimabæinn, þrátt fyrir að hafa búið víða síðustu áratugi. Jóhanna fer yfir æskuárin í Grindavík sem hafa verið einstaklega hlý og mótandi þar sem samvera, náttúra og íþróttir gegndu stóru hlutverki. Lífið í litla sjávarplássinu var ríkt af tækifærum og samhug. Jóhanna lýsir bernsku þar sem allir tóku þátt, hvort sem var í íþróttum, tónlist eða kirkjustarfi. Náttúran hafði einnig djúp áhrif og hún minnist Einidals og verunnar í Þórktötlustaðahverfi með hlýju. Að lokum vonar hún að reynslan, hversu sársaukafull sem hún hafi verið, verði ekki það sem brýtur fólk niður, heldur það sem mótar, styrkir og tengir. Og að Grindvíkingar, hvar sem þeir eru í dag, finni öryggi og frið á ný.

Kjartan Friðrik Adólfsson hefur verið búsettur í Grindavík frá árinu 1973. Hann rifjar upp æskuárin í Vestmannaeyjum, rýminguna vegna eldgossins á Heimaey og þróun bæjarlífs í Grindavík. Saga Kjartans veitir okkur dýrmæta innsýn í reynslu þeirra sem hafa misst heimili sín vegna náttúruhamfara. Hann leggur áherslu á að viðhalda jákvæðni og vanda ákvarðanir þegar kemur að endurbyggingu bæjarins, en um leið að hver og einn fái að ákveða hraða síns eigin heimflutnings. Tækniúrvinnsla: Óskar Kristinn Vignisson (Lag: Vilhjálmur Vilhjálmsson - Heimkoma)

Í þættinum ræða Örn Viðar Skúlason framkvæmdastjóri fasteignafélagsins Þórkötlu og Dagný Lísa Davíðsdóttir fjármálastjóri félagsins um starfsemi félagsins. Fasteignafélagið Þórkatla hefur leikið lykilhlutverk í að skapa Grindvíkingum fjárhagslegt svigrúm í kjölfar hamfara en um leið hvílir mikil ábyrgð á félaginu að tryggja búsetur í Grindavík til frambúðar. (lag: Vilhjálmur Vilhjálmsson - Heimkoma).

Gestur okkar að þessu sinni er Ásrún Helga Kristinsdóttir, forseti bæjarstjórnar Grindavíkurbæjar. Hún ræðir m.a. um uppvöxt sinn í Grindavík, hvernig samfélagið mótaði hana og lagði grunninn að hennar lífsviðhorfi og starfsvettvangi sem kennari og síðar bæjarfulltrúi. Þá ræðir hún stöðuna í Grindavík í dag og hennar framtíðarsýn.  (Lag: Vilhjálmur Vilhjálmsson - Heimkoma)

Tónleikarnir Líð ég burt frá landi voru í Grindavíkurkirkju, sunnudaginn 12. mars, 2023. Kvennakórinn Grindavíkurdætur frumflutti lög og texta eftir Kristínu Margréti Matthíasdóttur. Berta Dröfn Ómarsdóttir stjórnaði kórnum og Ingunn Hildur Hauksdóttir sá um meðleikinn. Tónleikarnir voru partur af skipulagðri Menningarviku Grindavíkurbæjar. Margrét Rut Reynisdóttir sagði frá vinnunni á bak við tónleikana, um undirbúninginn og hvernig þetta allt varð til.

Góðan daginn Grindvíkingar!  Alexander Birgir Björnsson mætti aftur í stúdíó240 og tók upp jólaþátt með sérlegri aðstoð frá Elínborgu Ingvarsdóttur, forstöðumanni Þrumunnar. Þau ræddu um jólahátíðina og fengu nokkra góða gesti í settið sem starfa við Grunnskóla Grindavíkur.  Við mælum með hlustun ef að þið viljið koma ykkur í jólaskap í þessu veðri.  Það verða svo sannarlega hvít jól þessi jólin. Um að gera að fá sér heitt kakó og smákökur, já eða pakka inn jólapökkunum!  Sérlegar þakkir til jólagesta þáttarins. Fram komu: - Elín Björg, sérkennari og móðir Alexanders. - Rakel V og Jón Breki fulltrúar nemendaráðs. - Garðar aðstoðar skólastjóri og Eysteinn skólastjóri. - Sindri og Lauga nemendur í 7.bekk. - Gerða Hammer stuðningsfulltrúi. - Rakel Pálmadóttir kennari. Gleðilega hátíð kæru Grindvíkingar, takk fyrir allt það liðna og takk fyrir hlustunina.